Суфле од ориз и тиквички

Суфле од ориз и тиквички 

Еве еден многу вкусен предлог за ручек, вечера, или мезенце кој се спрема многу лесно, а дегустаториумот ќе ви биди воодушевен 

Состојки 

150 гр ориз

400 мл млеко

100 мл неутрална павлака за готвење

2 тиквички

1 морков

150 гр сирење

5 јајца

Снопче власец

Магдонос

Сол, бибер, куркума, вегета, оригано, лук во прав или 2 чешниња

 

Подготовка:

Се вари оризот со малку сол во млекото и павлаката со често мешање пред крајот 15 минути, па се остава да излади.

 Потоа се додава ситно сечкан магдонос, власец, издренданото сирење, лукот, зачините и јајцата. 

 Тиквичките и морковот се рендаат и се додаваат во смесата, при што тиквичките ако се водени се цедат со раце или во газа. 

 Се убаво се меша и се истура во намрсена тава за печење.

Одозгора се попрскува со маслиново масло и се печи во загреана рерна на 180С околу 45 минути. 

 

©Фотографиите се авторски. Забрането е нивно преземање без согласност на авоторт. 

Рататуј со ќофтиња

 Рататуј со ќофтиња 

Иако оригиналниот рататуј се прави без месо, само од зеленчук, сепак исклучок се прави ако имате бунтовници кои не се по ручек од зеленчук, тогаш оваа верзија на рататуј е вистинската за нив. Потврдено :) 

Состојки 

За ќофтињата

0,5 кг  говетско мелено месо

1 кромид

1 јајце

2 лажици кисело млеко

2 лажици презла

Коцка за супа, зачин за мелено месо, прованса, бибер со лук во прав, сол 

Останато 

1 тиквичка

2-3 домати

3 компири

1 филџан доматно пире

Босилек, бибер, лук во прав

 Прелив 

2јајца

100 мл млеко

Сол 

За најгоре - рендан кашкавал 

 

Подготовка 

Исечкајте го ситно кромидот и измесете ја убаво смесата за ќофтиња од наведените состојки. Оставете ја најмалку еден час во фрижидер или најдобро одвечер во фрижидер.

Направете мали ќофтиња со големина пречник колку зеленчукот во обем. Кратко испржете ги од двете страни на малку масло врз нелепливо тавче и оставете ги на страна. 

Зеленчукот исечкајте го на тркалца со дебелина од околу 3,4 мм. Тиквичката и компирот ставете ги во еден длабок сад, додадете лажица-две масло и околу 1 лажиче сол и измешајте ги убаво да се налепи насекаде.

Користев тава 24 за овој зарзават, но би ве предупредила да користите некоја со повисоки страни или евентуално 26 број со малку накосено редење доколку немате висока (во печењето реши да префрла течноста).

Намрсете ја тавата со лажица-две масло и истурете го доматниот сос, кој претходно сте го измешале со сув босилек и лук во прав.

Врз него редете го зеленчукот и ќофтињата исправени.

Попрскајте со масло, посолете и додадете црн бибер одозгора.

Јас првите 20на минути во печењето ја имав покриено со алу фолија, но ако не ви е многу силна рерната, не мора.

Печете на 200С половина час, па разматете ги јајцата со млекото и солта и истурете ги рамномерно насекаде во тавата. 

Печете уште 5-10 минути, па изрендајте кашкавал одозгора. 

Вратете во исклучена рерна да се стопи кашкавалот.

 

©Фотографиите се авторски. Забрането е нивно преземање без согласност на авоторт. 

Роденденска Дата торта

 Роденденска Дата торта 

Знам, многу каснам со тортава, иако имам куп рецепти спремени уште пред да се решам да го стартовам блогот...Ама ќе речите барем датата да се запазеше дека е испишана на тортата. Е па, драги мои, дешавки се нижеа и тоа не многу пријатни, а да си признаам и заборавањето во меѓувреме исто така се заслужни. Но, битно е дека барем годината уште е таа истата хаха и мене годините ми се тие истите засега :))))))) 

Инаку, ја бирав со љубов и мерак, па јас и моите гости максимално уживавме во парчето роденденска торта. А вие треба да ја направите, пробате и да се уверите сами во тоа ;) 

Потребно

За кора

6 јајца

6 лажици шеќер

100 мл масло

4 лажици брашно

2 лажици какао

½ ќесе пециво

100 гр грубо мелени потпечени лешници

За 1 фил

750 мл млеко

3 ќесички прашок за пудинг со вкус на чоколадо

6 лажици шеќер

250 гр чоколадо

4 лажици Нутела

200 гр путер + 1 лажица шеќер во прав

За 2 фил

500 мл слатка павлака

1 лажица шеќер во прав

1 лажица инстант капучино

 

Подготовка 

Изматете ги јајцата заедно со шеќерот кремасто.

Со најмала брзина на миксерот додадете го маслото, а потоа рачно со кружни движења додадете ги останатите состојки од кои лешниците на крајот.

Смесата истурете ја во плехот од шпоретот кој претходно сте го обложиле со пек-хартија и печете на 180С 15на минути, зависно од силата на вашата рерна.

Оладената кора исечете ја на 3 дела. 

Во млекото со шеќер ставете ги прашоците за пудинг и сварете крем. Додека е жешко додадете го чоколадото на коцки и откако ќе се стопи додадете ја нутелата.

Се ибаво измешајте да се соедини и оставете да излади, па измиксирајте го претходно разбиениот маргарин со шечерот во прав.

На страна изматете ја слатката павлака со шеќерот и капучиното.

Филовајте кора-чоко фил-капучино фил. 

Готовата торта премачкајте ја тенко колку да израмни со остатокот од филовите и потоа украсете ја по желба. 

 

 ©Фотографиите се авторски. Забрането е нивно преземање без согласност на авоторт. 

Печен чизкејк со јаготки

 Печен чизкејк со јаготки 

За мене најдобриот чизкејк е печениот чизкејк, овој е лу-ди-ло! Прва згодна прилика морате да го пробате! 

Состојки 

За подлога 

180 гр мелени бисквити

100 гр стопен путер

Чиз смеса

3 јајца

130 гр шеќер

1 лимон шеќер

1 ванилин шеќер

100 гр рикота или несолена изварка

250 гр маскарпоне

250 гр овошен јогурт од јаготки

70 гр брашно

Топинг

250 гр јаготки

Сок од еден лимон

4 лажици шеќер

 

Подготовка

Најпрво се спрема подлогата, така што се мешаат бисквитите и путерот како „жив песок“ и се натапкуваат на дно на калап со откопчување бр 24.

Се остава во фрижидер додека се спрема чиз смесата.

Белките се матат во цврст снеги се тргаат на страна.

Жолчките се матат до згуснување заедно со шеќерите.

Им се додаваат овошниот јогурт, маскарпонето и рикотата и штом се изедначи на крај и брашното.

Смесата се истура врз подлогата и се става да се печи во загреана рерна 160-165С  околу 55 минути. 

Откако ќе се изгаси рерната се остава да седи уште 10на минути во неа.

Јаготките се сечкаат на парчиња се полеваат со сокот од лимон и им се додава шеќерот. Се варат околу 5-6 минути на средна температура и се оставаат да подоладат, па се тураат врз печениот чизкејк.

Тортата се остава убаво да олади пред служење.  

©Фотографиите се авторски. Забрането е нивно преземање без согласност на авоторт. 

Васина торта

 Васина торта 

Мој кувар и советник

1952 Народна књига Београд 

Не се сеќавам дали воопшто како мала сум ја пробала оваа популарна класика која оваа година гледам повторно е често правен десерт. Значи, за мене е прв пат. Решив дека е редно и јас да ја пробам, но како со тек на време се вршеле варијации, оригиналниот рецепт е оној кој е најтраган. Така, пред неколку месеци мојата пријателка Рози го сподели рецептот од нејзиниот кувар книга издаден некогашната 1952, што значи уште пред моето време, па претпоставувам дека овде го доловуваме оригиналот на Кралицата на тортите.

Би ви ја препорачала оваа торта во зима заради јајцата во филот, но не би се осмелила сепак. Верувајте, толку е вкусна што прашање е дали ќе прележи една ноќ во фрижидерот. 

Состојки 

За тесто

5 белки

5 жолчки

5 лажици шеќер

1 лажица брашно

6 лажици мелени бадеми (околу 80гр)

 Фил

125 мл млеко

2-3 лажици шеќер

200 гр мелени ореви

4 жолчки

4 лажици  шеќер

1 портокал

3 штангли чоколадо (60 гр)

150 гр маслац или путер

Шам

4 белки

250 гр шеќер

250 мл вода

 

Подготовка

Изматете ги белките со прстофат сол.

Во дру сад изматете ги кремасто и густо жолчките и шеќерот.

Потоа додадете ги брашното и мелените бадеми миксирајќи со најмалата брзина на миксерот и на крај, рачно измешајте го снегот од белките.

Ставете ја тортата во калап бр 26 претходно намрсен и посипан со брашно и печете на 160С околу половина час (проверете со чечкалица)

Млекото со шеќерот и оревите ставете го на средна температура на рингла и мешајте додека не испуштат арома оревите. Потоа тргнете го на страна да се лади.

Посебно изматете ги жолчките со шеќерот до убава крем структура и измешајте ги со оладените ореви (тука е постапката опишана со живи жолчки, но ако стравувате дека не ви се свежи јајцата, тогаш слободно изматете ги на пареа).

Во филот додадете ја кората и сокот од портокалот и стопеното чоколадо за готвење.

Посебно изматете го маслацот/путерот и додадете го во филот.

Со овој фил се премачкува кексот одозгора.

Водата и шеќерот за шамот ставете ги да вријат малку погусто отколку за слатко.

Во меѓувреме започнете да ги матите белките. Кога ќе станат снег и шербетот ја достигнал густината, така врел пополека со матење додавајте го во снегот од белки, при што претходно садот ќе го сместите врз друг сад и ќе го работите овој процес на пареа. Кога ќе го дотурите шербетот, тргнете го садот од пареа и матете додека шамот не олади.

Со него премачкајте врз филот со ореви и украсете со свежи или зашаќерено овошје, перли или било што по ваша желба. 

©Фотографиите се авторски. Забрането е нивно преземање без согласност на авоторт. 

Сочен чоколаден колач со афион и јаболко (без брашно)

 Сочен чоколаден колач со афион и јаболко 

(без брашно) 

Сакам да ви претставам еден прекрасен колач кој уште кога ќе го видите со око ќе го посакате, а кога ќе видите по составот дека ни ронкашт брашно нема во него ќе ви стани уште попримамлив покрај сочната и чоколадна структура што ја има...па уште ако сте љубители на афион...охохооо 

Состојки

За колачот

6 јајца

150 гр кафеав шеќер

250 гр чоколадо за готвење

150 гр путер

1 поголемо јаболко

200 гр мелен афион

За глазурата

130 гр чоколадо за готвење

30 гр путер

3 лажици масло

Уште

4-5 лажици мармалад од шипка или некој друг од киселкасто овошје (овде кај мене, од малини)

 

Подготовка

Стопете ги путерот и чоколадото на пареа и оставете да се ладат со повремено мешање. 

Белките со прстофат сол изматете ги во цврст снег.

Во друг сад за матење, изматете ги убаво жолчките со шеќерот.

Додадете им го оладеното стопено чоколадо со путер, мелениот афион и јаболкото изрендано на ситниот дел на рендето.

На крај, со шпатула и кружни движења измешајте ги белките. 

Смесата истурете ја во намрсена и обложена со пек-хартија тава бр 26 и печете ја на 180С околу 25 минути.

Печениот колач  премачкајте го со мармаладот, а потоа стопете ги состојките за глазурата и прелијте ја врз него. 

Одозгора украсете по желба.

  

За крај, еден поздрав од мојот град, Офицерски дом, Битола 

©Фотографиите се авторски. Забрането е нивно преземање без согласност на авоторт. 

Млад компир во ќофте

 Млад компир во ќофте 

Уште еден вкусен предлог за ручек. Побрзајте да го пробате додека има млади и поситни компири, не дека и со другите не ќе го бива, но се знае кое е послатко, нели? 

Состојки 

Околу 600 гр поситни млади компири (кај мене 15-16 на број)

3 ловоров лист

5 гр црн бибер во зрна

За меленото месо

500 гр мелено месо

1 главица кромид

1 јајце

1 лажица сув зачин

1 лажиче прованса зачин

По вкус црн бибер со лук во прав и пимент

3 лажици густо доматно пире

Грст ситно сечкан магдонос (или копар)

1 лажица презла

Прелив

100 мл млеко

2 полни лажици кајмак

Грст ситно сечкан магдонос или копар

1 лажиче чаден црвен пипер

1 лажиче црн бибер

½ лажиче сол

Уште

150 гр рендан кашкавал

 

Подготовка

Ставете го компирите со ловоровиот лист и биберот во зрно да се сварат 13на минути. На 3 минути пред крај посолете. Исцедете ги и оставете да оладат. 

Во друг сад спремете го меленото месо со наведените состојки, така што кромидот претходно ќе го изрендате. Измесете убаво и оставете во фрижидер додека се сварат и оладат компирите.

Земете едно топче од меленото месо и расплескајте го на дланката, па во него ставете едедн варен компир и обмотајте го со месото наоколу насекаде. Обликувајте со рацете да е топчесто и наредете во намрсена тава вр 24. Доколку сте свариле повеќе компири, а не ви стасала смесата за мелено месо, слободно ставете ги без него и тие исто така во неа.

Изматете ги состојките за преливот и со лажица најпрво прелијте врз секое топче во тавата, па на крај внимателно прелијте додека се потроши.

Тавата покријте ја со капак или алу фолија и ставете да се печи на 180С 35-40 минути. Потоа извадете ја фолијата/капакот и печете уште 10 минути. Ставете рендан кашкавал врз секое топче и вратете во рерна уште 10на минути. 

И за крај, поздрав од денот убав 

©Фотографиите се авторски. Забрането е нивно преземање без согласност на авоторт.

Пастицио (Παστίτσιο)

 Пастицио (Παστίτσιο) 

Се смета за грчки специјалитет, невообичаено за нашата кујна е што се додава цимет во делот со мелено месо и тоа го прави со посеен шмек. Поробајте, многу пријатно ќе се изненадите. Нека не ве плашат состојките, лесно се спрема, само садовите за миење ќе останат :) 

Состојки

За меленото месо

4 лажици маслиново масло

1 лажиче шеќер

2 главици кромид

Свеж тимијан (мајчина душица) или 1 лажиче сушен

1 чешне лук

2 лажици густо  доматно пире

750 гр мелено говетско месо

100 мл црно или црвено вино

2 домати (400 гр)

1 лажиче цимет

2 коцки за супа

2 ловоров лист

1/2 киска и повеќе сечкан магдонос 

1 лажиче сол

За бешамел

100 гр путер

100 гр брашно

1 литар млеко

½ лажиче рендано морско оревче

Сол и црн бибер

100 гр рендан кашкавал

3 жолчки 

 За тестенините

300-350 гр перфорирани шпагети или макарони

200 гр фета сирење

2 јајца

½ киска магднонос

30 мл маслиново масло

Ситно сечкан тимијан 

50 гр рендан кашкавал за одозгора

 

Подготовка 

Сварете ги тестенините.

Во тава на рингла ставете масло и ситно сечканиот кромид со шеќерот и 2-3 гранчиња тимијан. Пржете да се карамелизира кромидот. Потоа додадете го лукчето ситно исечкано и по минута пирето од домати. Пржете го уште 2 минути.

Додадете го меленото месо да се запржи. Потоа налејте го виното и кога ќе се соедини додадете ги и доматите, коцките за супа, циметот и ловоровиот лист и посолете.

Јас имав само половина кг мелено месо, па овде додадов една голема главица кромид и 2 помали домати. Немав свеж тимијан, па користев сув. Исто така имав доматен сос кој не беше паста, па најпрво додадов малку повеќе од дозата и чекав да испари течноста за да го постигнам до некаде ефектот. 

Кога сето ќе се соедини, тргаме од рингла, ги вадиме ловоровите листови и додаваме ситно сечкан магдонос.

Во тенџерче на рингла го топиме путерот и во него го додаваме брашното кое со мешање го пржиме минута до две, па го додаваме  во 2-3 наврати со мешање млекото. Треба да се добие кремаста структура.

Тргаме од рингла, посолуваме, додаваме ббиер и морско оревче и ренданиот кашкавал. Се убаво се меша да се соедини. 

Во тестенините го дробиме сирењето и ги додаваме останатите состојки, мешаме и ги распоредуваме рамномерно во намрсена тава 25х35 (кај мене 20х30).

Од бешамелот земаме една кутлача и ја додаваме во меленото место (јас оваа постапка ја заборавив, ама уживањето сепак воопшто не ни беше скратено) и го распоредуваме врз тестенините. Над нив го истураме бешамелот и одозгора поросуваме рендан кашкавал. 

Печиме на 180С 40 минути (кај мене е силна рерната, па намалив малку на време и 10С температура) и кога е готово уживаме во вкусот. Секако, најфино е кога ќе се навали на топло, но пресекот доаѓа до израз најдобро кога ќе олади : ) 

Жалам што пресекот не го доловив поубаво на готографиите. Бевме сите гладни и нестрпливи на примамливата арома. 

©Фотографиите се авторски. Забрането е нивно преземање без согласност на авоторт.