Тробојна проја

 Тробојна проја 

Многу луѓе обожаваат проја, па оваа во три слоја сигурно ќе им е фаворит. Ние не сме во тие луѓе, едноствано не сме учени на вкусот на пченкарното брашно, па полека, ненаметливо го упикувам повремено во нашето мени. Количината е солидна, па во овој случај за нас беа краевите, а се останато за носење, т.е. раздавање по луѓе. Ја направив со изварка наместо со сирење и едонствено тоа би го поправила во вкусот (ставете сирење, секако), па замислете колку бев пријатно изненадена кога скоро сите кои ја пробаа, покасно ми јавија дека многу им се допаднала (значи, не ја носев само неа, имаше и други работи...колку за споредба). 

Преубава за око, вкусна и исто така важно, иако има јајца, не ви треба миксер, ами доволна е само една маталка и работите одат многу брзо за да се спреми тестото. Битно е само вие пред време да си ги исечкате паризерот и корнишоните на мали коцкички и спанаќот се разбира, сецнете го или искинете го на поситно. 

Состојки 

Чаша = 200 мл

5 јајца

3 чаши газирана вода

2 чаши масло

3 чаши пченично брашно

3 чаши пченкарно брашно

1 ќесиче прашок за печење

1 лажица сол

200 гр сирење

Уште:

150-200 гр паризер

2 поголеми корнишони

300 гр спанаќ

3 лажици ајвар  

Подготовка: 

Најпрво ја вклучуваме рерната на 180С да се загрее.

Ги разматуваме јајцата со маталката како за кајгана.

Ги додаваме прво течните, па потоа сувите состојки и мешаме.

На крај го додаваме и дробено сирењето и уште еднаш мешаме.

Смесата ја делиме на 3 еднакви дела. Во првиот го додаваме сечкан спанаќот, во вториот саламата и корнишоните исечкани на ситни коцкички и во третиот ајварот.

Првиот дел го истураме во тава 25х35 обложена со пек-хартија или намрсена и печиме некои 5 минути, само колку горниот слој да потфати коричка за да можи следниот слој да се премачка врз него, а да не се измешаат.

Потоа внимателно го премачкуваме вториот дел и на ист начин и третиот, па печиме уште 30-40 минути во зависност од силата на рерната. 

Готовата проја ја оставаме малку да излади, па ја вадиме од тавата и ја ставаме на решетка за комплетно да се олади.

Се сечи на посакуваните парчиња кои освен што се вкусни, се и прекрасно шарени од слоевите. 

Вториот и третиот ден е уште повкусна отколку на денот кога ќе се испечи. 

* Фотографиите се авторски. Забрането е преземање на истите без согласност на авоторт. 

Пивски леб

 Пивски  леб 

Лебот има интересен вкус, кој кога ќе се касни едно залаче колку и да не ви е до јадење, ќе посакате уште. Со тоа се сложија и најпребирливите кои го пробаа. Пивото му дава особена сласт додека го јадите, што сигурна сум дека ќе го имате во вашиот бележник за често да го спремате. 

Има само една маана, а тоа е што лебот не е голем, па или дуплирајте ги состојките, или спремете се за скоро повторно да го правите :) 

Состојки 

250 мл пиво 

1,5 лажица масло 

2 лажички сув квасец 

1 лажиче сол 

400 гр брашно 

Подготовка 

Во садот за месење ставете го пивото, па додадете го квасецот, солта, шеќерот и маслото. Потоа постепено додавајте брашно и замесете тесто. Овде можи да го искористите и миксерот со додатоците за тесто. Оставете да се дуплира, па префрлете го во долгунест калап обложен со пек-хартија.
Печете на 180 степени околу 20 мин. (провизорно).
Испечениот леб премачкајте го со вода со помош на четче и покријте го околу 5 мин. Потоа извадете го од калапот и завиткајте го во платнена пацета да подолади. 

©Фотографиите се авторски. Забрането е нивно преземање без согласност на авоторт.

Ролат со јаболка

 Ролат со јаболка 

Како да ви го претставам ролатот и неговата вкусотија и мекост? Иако фотографиите се правени ноќно време, сепак, се надевам дека и тие ќе ви го доловат вкусот на ролат и печени јаболка. Меко, вкусно, само се јади :) 

А што е најинтересно не се замарате воопшто со филовање. Овде оди се во едно. Единствен напор ќе ви е само сечкањето и матењето. За среќа, јас ја користев алатката за сечкање на Делимано, па тој дел одеше многу полесно. 

Состојки:

За тесто:

4 големи јајца

120 гр шеќер

1 ванилин шеќер

4 лажици ладна вода

1 прашок за печење

120 гр брашно

Уште:

4 големи јаболка

Сок од половина лимон или еден мал

1-2 ќесички цимет 

 

Подготовка: 

Излупете ги јаболката, пресечете ги на половина или четвртинки и потоа исечкајте ги на тенки ливчиња од околу 2 мм.

Измешајте ги во сокот од лимон за да не отемнат и тргнете ги на страна додека го работите тестото.

Изматете ги најпрво белките со малку сол во цврст снег и оставете ги на страна. Местото каде што ќе стојат се препорачува да не е многу топло. 

Во друг сад за матење изматете ги жолчките со шеќерот до згуснување и побелување. Во меѓувреме можите да го додадете и ванила шеќерот.

Сега додадете ја водата, лажица по лажица, при што за секоја ќе матите по околу 1 минута.

На крај додадете го просеано брашното и прашокот за печење. Соединете со најмала брзина на миксерот.

Сега, со шпатула и внимателно кружно мешање од горе на долу вмешајте ги белките со додавање во неколку наврати.

Обложете го со пек-хартија плехот од шпоретот.

Врз него наредете ги скалесто парчињата јаболка, само малку да се преклопуваат. Поросете ги со цимет по ваш вкус.

Врз јаболката истурете ја смесата и израмнете насекаде. 

Печете во загреана рерна на 180С, 15-20 минути. 

Печената кора покријте ја со пацета и оставете ја 10на минути. Потоа извадете ја од плехот превртена врз пацетата или ако сакате друга пек-хартија и внимателно завиткајте ја во ролат.

Оставете барем еден час на ладно да се стегни пред да уживате во вкусните парчиња. 

По желба можите да го поросите ролатот со шеќер во прав. 

©Фотографиите се авторски. Забрането е нивно преземање без согласност на авоторт.

 

Карамел dulce de leche од засладено кондензирано млеко

Карамел dulce de leche од засладено кондензирано млеко 

Се трудам да го најдам најзгодниот назив за ова фаворитно кремче кое е толку неодоливо и вкусно што едноставно додека се вкусува навираат емоции... лебдење :) 

Одлично е за премачкување на прочуениот кекс Трилече, за во палачинки, за филовање на колачи, торти... едноставно за се. Му дава млечно карамелест вкус и посебно уживање на десертите :) 

Потребно

Конзерви со кондензирано млеко по желба

Вода по потреба

 

Подготовка

Во тенџере ставете ги конзервите со кондензирано млеко, претходно исчистени од етикетите.

Конзервите доколку ви е позгодно можи да ги сместите легнати.

Налејте вода еден прст над конзервите, да ги покрива.

Водата можи да е и загреана и ладна. Доколку е ладна времето за варење се продолжува за уште половина час. Јас ставив солидно топла вода од бојлер.

Варете на средна температура 2 часа. 

Важно е кога и ако водата испари да се дотури вода да ги покрива лименките и јачината на ринглата да ја подесите да има константно клокотење, варење на водата, т.е. водата на рингла да е над 100 степени. Доколку имате капак за тенџерето, ќе ви заштеди дотурање на вода која не треба да е ладна. Јас во тие два саати дотурив само еднаш. 

Кога ќе ја отворите лименката карамелот ќе е цврст, т.е. покомпактен. Измешајте го убаво за да добие кремаста структура. 

©Фотографиите се авторски. Забрането е нивно преземање без согласност на авоторт.

Суви колачи со таан или путер од кикиритки

 Суви колачи со таан или путер од кикиритки 

Овие колачиња беа често правени и хит во една фб група наречени со името Таанки кои мене многу ми се допаднаа баш заради таанот во нивната содржина. Но, таанот и путерот од кикиритки за мене се сродни по состав, па така јас направив една доза со таан и една со путер од кикиритки. Што да ви кажам...прекрасни се! Скоро па доловена структурата на купечките колачи. 

За оние кои сакаат суви колачи и блага нота од овие арматични додатоци <3 

Состојки

100 гр путер

100 гр шеќер во прав

100 гр таан или путер од кикиритки

200 гр брашно

2/3 лажиче пециво

Прстофат сол

1 – 2 лажици сок од лимон или вода

30 – 40 гр чоколадни капки или сечкано чоколадо

 

Подготовка

Путерот и шеќерот ги миксираме.

Кога ќе се спојат го додаваме таанот или путерот од кикиритки и повторно миксираме.

Овде кај мене на сликата се едните со таан, а другите со путер од кикиритки.

Се додава брашното и прашокот за печење, прстофат сол и се меси. На крај се додава сокот од лимонот или вода или мешано.

Треба да се добие ронливо тесто кое кога ќе се стисни во дланката треба да ја задржи формата, да не се растресува. 

Значи, не додавајте отповеќе вода ако нема потреба, оти нема да ви се ровки колачите, а верувајте ми на јадење изгледаат купечки, иако изгледот е рустичен. 

Чоколадните капки можи да ги додадете во тестото, откако ќе ги формирате одозгора или и така и така.

Тестото се завиткува во најлон фолија и се остава половина час во фрижидер.

Потоа се оформуваат мали топчиња кои нежно се сплескуваат, се радат во плех со хартија на растојание и се печат на 180С 12на до 15 мин. Зависно од рерната. 

Извадени од рерна се се уште меки, но штом оладат, се стрврднуваат. 

Дозата е мала, па не верувам дека ќе останат, но сепак складирајте ги во затворена кутија за колачи. Како суви колачи можат да траат најмалку една седмица и повеќе. 

*Една доза е = за еден плех од шпоретот. 

 

©Фотографиите се авторски. Забрането е нивно преземање без согласност на авоторт. 

Колач Медено срце

 Колач Медено срце 

Се сметам дека не сум љубител на кексови без јајце во тестото, но овој е еден од тие посни колачи кои многу пријатно ме изненадиле на вкус, па дури и ме направиле да посегнувам повеќе пати и да се сладам во неговата вкусотија, што посленава деценија не е веќе тоа во мои потреби и најчесто од се благо што ќе спремам каснувам едно парче, додека е топло, тазе, ретко или со усила следниот ден би каснала некој залак...евентуално:) Е, ова, ете, на мое изненадување, беше еден од исклулоците :) 

Состојки

300 гр брашно

2 лажици какао

1 ќесе пециво

1 лажиче цимет

1 рамно лажиче каранфилче

300 мл вода

100 мл масло

150 гр шеќер

2 лажици мед

5 лажици мармалад

За премачкување

5 лажици мармалад

Глазура

100 гр чоколадо

50 гр маргарин

3-4 лажици масло

 

Подготовка

Колачево е старински рецепт кој се спрема многи брзо и едноставно, без миксер, со мешање се во еден сад.

Најпрво се мешаат водата и маслото во кои се додаваат шеќерот, медот и мармаладот.

Откако убаво ќе ги измешате да се растворат, ги додавате пецивото, каранфилчето и циметот, па потоа какаото и брашното. Нив убаво е да ги додадете преку сито, иако ништо не е страшно и без него.

Кога се ќе се измеша во глатка смеса, половина од неа се истура во намрсена тава и се печи 10на минути во загреана рерна на 170С.

Потоа се вади и се премачкува со мармалад. 

Убаво е да користите некој кисел мармалад, најчесто се употребува од кајсија, а кај мене се згоди еден домашен од дуњи, јаболка и сливи кој одлично се вклопи во колачот.

Врз мармаладот се распоредува останатата смеса од тестото убаво, насекаде врз мармаладот и се враќа во рерна да се допечи околу 20на минути.

Печениот колач го премачкуваме со глазурата која во овој случај најлесно е да ја стопите во веќе загреаната рерна. 

©Фотографиите се авторски. Забрането е нивно преземање без согласност на авоторт. 

Брза дробена салата во тегли

 Брза дробена салата во тегли 

Со спремањето на оваа салата најмногу време ќе изгубите во миењето и сечкањето на зеленчукот отколку со останатиот дел во спремањето.

Освен што ме привлече леснотијата за спремање и изборот на колку тегли отприлика ќе сакам да полнам, ме изненади и додавањето на зрел домат во зимница што кај нас не е обичај, па решив дека и така мора да се проба. Како испадна точно зајре за да се наполнат теглите, во прва прилика кога ќе ја отвориме да ја пробаме ќе се навратам да го напишам впечатоците. Секако, доколку пак некој направи по рецептот, ќе ми е драго да ми напиши коментар и импресии. 

Состојки

2 пиперки ками

2-3 моркови

2 домати

6 -8 корнишони

7-8 чешниња лук

За една тегла

1 лажица сечкан магдонос

5-6 зрна бибер

1 рамна лажица шеќер

1 неполна лажица крупна сол

3-4 лажици масло

3 лажици прехрамбена киселина

Зовриена вода 

Подготовка

Исечкајте го зеленчукот на ситни парчиња.

За овие состојки ќе ви требаат 3 големи тегли.

Редете по тенок ред од секој зеленчук, почнувајќи од лукот. 

Јас во една додадов и сечкан млад кромид плус од наведените состојки, па ќе видиме за една седмица како ќе се вклопи кога ќе ја пробаме.

Кога ќе ги наполните теглите, најгоре додадете го магдоносот и биберот.

Потоа додадете ги шеќерот, солта, киселината и маслото.

На крај турајте зовриена вода постепено во теглата додека не се наполни до горе.

Штом е полна, веднаш затвотете ја со капачето и превртете ја однопаку.

Така нека седат додека комплетно не оладат. 

©Фотографиите се авторски. Забрането е нивно преземање без согласност на авоторт. 

Мешана салата - зимница

Мешана салата - зимница  

Време е за зимници. Оваа салата толку лесно се прави, што само е потребно време и малку сечкање и никаков друг напор, а е толку вкусна. 

Можи да си изберите каков сакате зеленчук, а јас скоро секогаш гледам да е со колку можи повеќе видови. Овој пат се осмелив наместо класична зелка да ставам црвена, иако стравував од можноста таа да ми го обои другиот зеленчук преку солилото, особено карфиолот, но тоа не се случи. 

Состојки 

10 кг зеленчук – карфиол, брокула, морков, зелка, црвени пиперки ками, корнишони, зелени домати, магдонос, керебис 

Солило

300 гр крупна сол

400 – 500 гр шеќер

1 литар прехрамбена киселина

1 ќесиче винобран 

Подготовка  

Исечкајте го зеленчукот на парчиња, брокулата и карфиолот искинете ги на цветови, магдоносот и керебисот исечкајте ги.

Се измешајте во голема шерпа .

 Потоа додадете ги состојките за солило и повторно убаво измешајте.

Оставате го 12 часа така да седи пред да го соберите во тегли со повремено мешање.

Пред да соберите во теглите, пробајте го за вкус и ако има потреба дотерајте по ваша желба. 

 Во секоја тегла откако ќе го наредите зеленчукот со набивање, ставете неколку зрна црн бибер и дотурете до навојот од солилото, па затворете.

©Фотографиите се авторски. Забрането е нивно преземање без согласност на авоторт. 

Доматна салца

 Доматна салца 

 Рецептот од стариот тефтер насловен како Кечап, не сум го правела долго време, но се сеќавам колкава интересна атракција ни беше во тогаш. Оригиналот е до состојките кај е пишан црн бибер, а другото се мои додатоци кои се должат на поголемата палета на зачини денес и искуството кое се стекнало со тек на времето. Овој пат кечапот, кој решив овде да го насловам со името Салца, сметајќи дека ќе е поприлагоден назив, испадна во мноооогу подобрена и повкусна верзија од тој кој буди вкусни и драги спомени од едно минато време. Верувајте, откако ја направив едно тегличе отиде само со сркање и макање со леб. 

Идеална е како додаток со јадења со месо, како додатов во готвени јадења, како сос, како додаток за пици, ма скоро за се кај трпи домат е перфектна! 

Состојки

5 кг домати

2 кг  црвени пиперки ками

2 главици лук

250 мл масло

3 ловоров лисја

3-4 лажици  сенф

1 пакетче црн бибер

1 рамна лажица шеќер

1 лажица мешан зачин

1 лажица сув босилек

1 рамно лажиче оригано

1 рамно лажиче мајоран

½ лажиче пимент

1 лажица коријандер во зрно

Сол по вкус 

 

Подготовка

Доматите и пиперките се обаруваат, па се лупат. Јас пиперките ги обарив излупив тоа што можеше да се лупи, а другото со блендерот измелив, не даде лушпа никаде да се појави. 

Доматите, пиперките и лукот измелете ги и ставете ги во тенџере да варат.

Откако ќе испари водата му се додава маслото и ловоровиот лист. 

Кога скоро ќе се преполови содржината во тенџерето ги додаваме зачините и сенфот и дотеруваме на сол по вкус. Кај мене чинам отприлика додадов околу едно лажиче, но секој со вкусовите и желбите, а зачините малку порано од предложеното, само сенфот на крај. Бибер додадов и во зрно, но мелен ви препорачувам. 

Врелата салца се бери во чисти тегли додека е жешка кои веднаш се затвораат. 

Се чува во ладно и темно место. 

©Фотографиите се авторски. Забрането е нивно преземање без согласност на авоторт.